പുഴയില്‍ച്ചാടിയ യുവാവിനായി തിരച്ചില്‍

കോഴിക്കോട്: മാങ്കാവ് നടപ്പാലത്തില്‍ നിന്ന് യുവാവ് പുഴയില്‍ച്ചാടിയെന്ന അഭ്യൂഹത്തെ തുടര്‍ന്ന് ഫയര്‍ഫോഴ്‌സും നാട്ടുകാരും തിരച്ചില്‍ നടത്തി. വൈകിട്ട് അഞ്ചരയോടെ യുവാവ് പുഴയില്‍ ചാടിയെന്നാണ് കരുതുന്നത്. തുടര്‍ന്ന് കുറച്ചുദൂരം നീന്തിയതിനുശേഷം യുവാവിനെ കാണാതായതായി ദൃക്‌സാക്ഷികള്‍ പറയുന്നു. ബീച്ച്‌സ്റ്റേഷന്‍ ഓഫീസര്‍ സാബുതോമസിന്റെ നേതൃത്വത്തില്‍ മീഞ്ചന്ത സ്റ്റേഷനിലെ ഉദ്യോഗസ്ഥര്‍ രാത്രി വൈകിയും തിരച്ചില്‍ നടത്തിയെങ്കിലും ഫലമുണ്ടായില്ല. യുവാവ് ചാടിയ ഭാഗത്ത് പുഴയില്‍ ചളിനിറഞ്ഞ നിലയിലാണ്. ഉത്തരേന്ത്യക്കാരനായ യുവാവാണ് ചാടിയതെന്ന് സംശയമുണ്ട്.